BAI EUSKAL HERRIARI herri ekimena osatzen dugun gizon eta emakumeok gure hausnarketa helarazi nahi diegu euskal herritar guztiei: Gaurkoa egun beltza da Euskal Herriarentzat. Egun beltza euskal herritar gisa gure eskubideak urratuak izanagatik garen bezala bizitzeko borrokatzen garenontzat. Baina are gogorragoa da abertzale sentitzen garenontzat.

Egun Euskal Herrian, ofizialki deklaratu gabeko guda bat sufritzen dugu. Metroz metro eta esparruz esparru garatzen den guda politiko bat. Finean bere biziraupena bermatu eta garatu nahi duen nazio ukatu bat eta bere boterea eta nortasuna inposatu nahi duten estatuak aurkitzen dira parez pare.

Eusko Alderdi Jeltzalea ez dago guda zelaiaren erdian, maiz horrela kokatu nahi izan bada ere. Espainia liluratu nahi zutenak, lortzen ari direlakoan gaude, baina... zein da ordaindu beharreko prezioa? Eta are garrantzitsuagoa dena, nork ordaindu behar du? Espainiar Estatutik indar erakustaldi lotsagabe hau gauzatzen den bitartean, EAJk bere leialtasun froga gainditu du. Euskal Herria ukatu, zatikatu eta desagerrarazi nahi dutenen esanetara jarri eta Euskal Herriari bizkar eman dio. Bilbon bandera espainiarra inposatu du Azkuna jaunak eta gainera inoiz egon den altuen jarri du gure gainetik dagoela esan nahirik bezala.