Egun osokorako egitaraua prestatu du Astrako koordinadorak zapaturako

Egoera salatu eta finantziazio bide bat izatea nahi dute antolatzaileek

`Astra proiektua aurrera! Bittartien Pasilekure´ lelopean, Astrako koordinadorak egun osoko egitaraua prestatu du datorren zapaturako. Jai giroa nagusituko bada ere, aldarrikapen kutsua ere izango du jaialdiak. Helburu bikoitza izango du, batetik, bizi duten egoera kalean salatu nahi dutelako koordinadorako kideek eta, bestetik, Astra eraikina itxita egoteak ekarri duen diru sarrera ezari irtenbide bat eman nahi izan diotelako. «Orain arteko bizi gastuak eta etorkizuneko bizileku berria martxan jartzeko izango ditugun gastuei aurre egiteko», euren esanetan.

Egunez Pasealekuan hainbat ekitaldi izango dira: bazkaria, ikastaroak, Amazigh-en hizkuntza eta jolasak, munduko II. futbolin txapelketa, eskupilota partidak... Arratsaldean manifestazio batek zeharkatuko ditu herriko kaleak. 20:00etan abiatuko da Pasealekutik.

Gau partean, aldiz, musikak hartuko du erreleboa, kontzertua izango baita Astraren kanpoaldean. The Uski’s, Sarkor, Zea Mays eta Delorean taldeak izango dira oholtza gainean. Sarrera 10 eurokoa izango da. Kontzertutik ateratako irabaziak Pasealekua izango dugun bizileku berriko obrak egiteko erabiliko dira. 

Astrako koordinadorako kideek diotenez, "Astraren autogestio proiektua bultzatzeko egun gisa ulertzen dugu maiatzaren 10a. Orain urte bi hartu genituen helburuak ez ditugu inolaz albo batera utziko".