Atzo izan zela ematen du, baina Bilbo Handi osorako penstatutako irrati proiektu hau sortu genuenetik dagoeneko hamabost urte pasatu dira. Hamabost urte luzeak izan dira, momentu gehienak pozgarriak eta baikorrak, baina egon badira momentu latzak, gure kidea hainbat urtez izan zen Haritz Totorika detenitu, torturatu eta atxilotu zutenean, edo Zubi gure beste kidea hil zenean adibidez. Dena den, pausuz paus proiektu hau eraikitzen joan gara, Bilbo Handian ezkerrean marka anitzan mugitzen diren sozial eta kultur elkarteei zuzendutako programazioa sendotuz. Horren adibidea Ahlan saioa (etorkinen ingurukoa), dagoeneko hamar urte iraun duena, edo saio gazteagoak, Axa Mixa edo Kaleko Bentanieren kasuak, edo beste irrati libreekin egondako kolaborazioari esker sortutakoak, Suelta La Olla bezala, eta beste hainbat.

Arrazoi ezberdinak direla eta, duela hilabete batzuk gure proiektuaren baitan aldaketa garrantzitsuaren aldeko apustua egin genuen, bai egiturak eta bai funtzionamenduaren aldetik. Aldaketa guztiak bezala, ez dira ikusten hurrengo egunean, baina epe luzera espero dugun emaitza zera da: jendartean eragina duen komunikabide alternatiboa izatea, gure inguruan dauden giza elkarte guztiak laguntzen dituena bere ekitaldiak eta aldarrikapenen berri emanez.

Aldaketa horrekin jarraitzeko, eta hamabost urte hauek ospatzeko ere, ostegun honetatik aurrera irratian aldaketa batzuk egitea erabaki genuen. Hasteko, ikus dezakezue web orriaren diseinuaren aldaketa. Horretaz gain, epe laburrean beste atal berriak sartzen saiatuko gara. Pentsatzen dugu garrantzitsua dela web orria gure proiektuaren ispilu sendoa eta partehartzailea izan behar dela.

Web orria alde batera utzita, beste motatako aldaketak egin ditugu ere. Hauetariko batzuk honakoak dira:

• Zaratas konpartsa berriaren estreinua; asteburu honetan Konpartsen Koordinakundeko jaitsieran parte hartuko dugu sortu berri dugun konpartsa honekin.

• Berritako saioaren emisioa: Pititakoko kideok elkarte sozial eta politikoen inguruan egindako informatiboaren asteko laburpena.

• Irratiko sintonien aldaketa.

• Arrosa Irrati Ekoizpen Zentroan dauden Euskal Herriko beste irratietako euskaraz egindako saioek osatutako marra baten hasiera.

• Copyleft musikaz osaturiko beste franja baten hasiera, Euskal Herriko musika alternatiboa eta jabego intelektualaren beste ikuspuntu hau bultzatu nahi dugulako.

• Aipu kultur eta politikoak tartekatzea emisio automatikoan.