Pertsonak eta pertsonen duintasuna errespetatzen ez duen espetxeetako errealitate gordinak horiengan guztiengan, egunak joan eta egunak etorri, sorrarazten dituen sufrimenduen partaide gara. Konponbide etiko batetarantz urratsak eman beharrean, beraien egoera hondatu eta areagotzen ari da, kate luzea osatuz doan zapalketaren bidez, sakabanaketak, isolamenduek, urrutiratzeek, euskal preso politikoen zigorren luzapenak, atxilotuen inkomunikazioak, torturek eta areago egun hauetan, berriro ere, agertzen diren “gerra zikina” praktikaren ondorioek erakusten digutenez. Senideen bidaia nekagarriak, istripu larriak izateko arrisku eta ondorioekin, eta giza duintasunarekiko errespetuagatik onar ezin daitezkeen miaketak egiten jarraitzen dute. Honek guzti honek hainbeste injustizien amaiera eta beraien eskubideen erabateko begirunea eta, zer esanik ere ez, ezarritako legalitatea bete dadila eskatzera behartzen gaitu, justiziaren eta gure kristau sinetsitasunen eta konpromisoaren izenean.

Halaber modu bereziaz kezkatzen gaituzte eta konpartitu dugun gogoeta eta otoitzerako gai izan ditugu preso sozialek, etorkinek, gazteek pairatu behar dituzten giza egoera penagarriak, pertsona gisa, espetxeetan, ezereztu egiten dituen espetxe politikaren biktima direlarik. Bestalde, giza baldintza duinetan jendartean izan behar duten etorkizuna bermatuko dien birgizarteratze sozialerako aurreikuspen eta bitartekoen gabezia egiaztatu eta salatu egiten ditugu.

Gatazka polítiko eta soziala gaiztotuagotzera daramaten egoera hauen guztien aurrean, “zapalduak askatzera etorri zanarengan” sinestedun garenez, espetxe-araubidearen injustizia eta beraren bidez gauzatzen diren giza eskubideen zapalketak salatu egiten ditugu. Utziezina den pertsona ororen duintasunaren kontrako eraso dira eta bere burua legezkotzat duen Estatuaren salaketa; izan ere, bere legalitatea ere ez du betetzen zigorraren hiru laurdenak bete dituztenen askatasunari eta Estatu espainiar eta frantziarrean sakabanaturik dauden eta gaixotasun larriak dituztenei dagokienez.

Guztiok erantzule izan eta sentitzen garen egoera honetan, iragartzen ditugun salaketa eta eskakizun hauen bidez, Euskal Herrian eta Herri guztietan justizia, amnistia, askatasuna eta bake sozial eta politikoa erdiesteko gure itxaropena eta konpromisoa adierazten ditugu.

 Kristau Elkarteak Arantzazutik

 2010ko martxoa